Jaisa Apna Hai Nabi – Koi Payambar Na Mila

Wordings

English

Jaisa apna hai Nabi, koi payamber na mila 

Saff shikan deikh liye, eik bhi Haider na mila 
Fatima aisa koi noor ka mahwar na mila 
Aaj tak Shabbar o Shabbir ka hamsar na mila 
Panjeta Paak se kaunaiN meiN behtar na mila 

Jaisa apna hai Nabi, koi payamber na mila 

Raat bhar tadpa kiya, pyaas ke maare ki tarha 
Khamoshi lab pa thi, darya ke kinare ki tarha 
Yaad e Sheh dil meiN thi, bahte huEy dhaare ki tarha 
Dar e Shabbir pa pahoNcha hai, sitaare ki tarha 
Hurr ke manind, naseebe ka Sikandar na mila 

Jaisa apna hai Nabi, koi payamber na mila 

Aam logoN meiN kahaN, Nafse Payamber ka jawaab 
Khaak ke putle nahiN, noor ke paiker ka jawaab 
Har sipaahi kahaN ban jata hai, lashkar ka jawaab 
Kaise mil jaaeiga Ashaab meiN, Haider ka jawaab 

Bazm e Ashaab meiN jab doosra Bu Zarr na mila 
Jaisa apna hai Nabi, koi payamber na mila 

Baaghe Firdaus e Iram, chaahiye Kausar ke liye 
Noor hi zeib hai, kuch noor ke paiker ke liye 
Ek samandar ki zaroorat hai, samandar ke liye 
Rab ne Haider ko chuna, Bint e Payamber ke liye 

Chashme Qudrat ko bhi iss ghar ke siwa kuch na mila 
Jaisa apna hai Nabi, koi payamber na mila 

Shab ke ta’binda sitaroN se unheiN kuch na mila 
Din ke rangeen nazaroN se unhein kuch na mila 
Iss zamaane ki baharoN se unheiN kuch na mila 
Bahte darya ke kanaroN se unheiN kuch na mila 

Zindagi meiN jinheiN Mahir*, gham e Sarwar na mila 
Jaisa apna hai Nabi, koi payamber na mila

Shares
Scroll to Top